بغــــداد / احسان محمد علي
- التفاصيل
- نشر بتاريخ الخميس, 28 تموز/يوليو 2016 17:37
جاي من الغُربمتعني يا بغداد
وآني بالغربه اغراب اسود
او نايم بسرداب
دنيه حلوه
وناس حلوه
وآني مثل بندقية صيد
بايعهه العذاب
اجيت ارتاح يا بغداد
واحچي كل البالي
واكتب على تراب الوطن چلمه
بدمع ما يشبه الخنياب
وقصيدة حب مكتبهه ابد غيري
وافتح للعشگ هم باب
اجيت احچي ومخايف
واليصير ... يصير
وسكـّت كل نذل چذاب
تبقى يا عراق الخير
رايه مرفوعه على الاكتاف
وسيف ما ينشاف
يذبح كل دعي او مُدعي
او مرتاب
اجيت وشايل همومي
وافرح من اشوف الشعب متوحد
وتجمعنه المضايف
شيعي أو سني أو مسيحي
مثل خيمة منصوبه
مثل نخله مشكله الارطاب
كلمن ياكل بكيفه
وكلمن يعبد بكيفه
والله ايحاسب الوادم
الله الواحد الوهاب
خل نلتقي على جسر (الائمه)
بلايه حزن واعتاب
خلي نعمر المهدوم
ونشبع الجوعان .. والمحروم
والله مسبب الاسباب
ارد اشوفك يا عراق الخير
نجمه متعليّه
ورايه مرفوعه
هتاف، ولافته، وكتاب
ارد اشوفك عزيز الجانب
وبصحه موفوره
اريد اشوف الشوارع مبلطه
والحدايق تلم طيور المحبه
والهوى غلاب
اريد اشوف المدارس تحضن
الطلاب
اريد اشوف البسمه مرسومه
على الاشجار
على اوجوه الطفوله
خطيّه انحرمت اهوايه
وبلا اسباب
اريد اشوف الناس تحچي
بلايه خوف
اريد اسمع قصائدكم تغني
مواويل العشگ
ومنو غنًه ومنو يكتب
مثل (عريان) او (شاكر) و (النواب)
منو مثل (سليم) الغنّه باللوحه
عزف بيها نشيد الثوره
الخلاب
منو مثل (سيّابنه)
يغني من (لندن) على (جيكور)
(ولميعه) تنتظر
آخر قصيده اتكحل اعيون المها
ويبقى واگف (السياب)
(بالعشار) يكتب شعر ما مسموع
للاخيار .. والاطياب
واحنه نكتب الباقي
على الواح (المسله)
(شده يا ورد شده)
(شده يا وطن شده)
رغم انف الحقود
وجوگة الاذناب
احنه سيوف مرفوعه
من الرمادي لأعلى الزاب
كلها تهتف يا عراق
كلها متحزمه زلم
حارسه الباري (وعلي) الوثاب
الله ميهمه تصلي
الله يريد العراق يصير جنه
وبغداد هم فصل الخطاب
الله ايريد العداله
ونوكل من تمرنه السايمه
وحتى ليصلي بلايه قبله
على ارض العراق
والله مقبوله صلاته
ومرفوعه يم رب الارباب
عراق يا ارض النبوه
حتى (يونس) هم عراقي
و (ابراهيم) الذبح ابنه على ترابك
عراقي
والنبي (طه) عراقي
ارض شرفه (الكيلاني) و(الامام الاعظم)
و (الكاظم) المسجون
والغالب اسد الله (ابو تراب)
دخيل الله
ترفع سيفك البتار
مثل يوم (الخندق) المشهود
وتدفع باب(خيبر)
ويعيش العراق ابسلامه.. او تسامح
ويبقى شباب
الناس تزور مرّه
وآني كل خميس ازور (الطف)
والله اليعرف الله
ويزور (الحسين)
يموت وبليه حساب
هو عنوان الشهاده
وعز بغداد وفرحهه هم صلاه
والله هم اجزل ثواب
ذوله اهل (الرمادي) و (الحشد)
ايد وحده
ومثل حلگ الاسد
ميهمه ناب
تزول هلغمه اللئيمه
ونشرب الماي العذب
الخاطر الله شگد عذب مايك يا دجله
ومستطاب
يا ربي ارحم اعيون العراق
والطفوله .. واليتامه.. والارامل
وما يبقى خراب
وتنتهي الغصه الچبيره
وينهجم بيت الارهاب
حتى نبقى نقره القصايد
على دجله كل خميس
(بغداد والشعراء والصورُ)
وننسى هاي الغربه
أو ننسى الغياب