الى الزعيم عبد الكريم قاسم / جلال السيد مكي

زعيم انتة لبلادي وفخر ماضيهة جدحت الهة الشرارة ودرب مهديها

بلادي وانتة عزهة وصيتهاالمعهود صورة عله الگمر رسمت معانيها

الهدف عزة شعبنه ورسمت الهه حروف نهجهه النهجته وغايات مغنيها

يمصبح فجرهة وزحت عن بغداد حمل همهه الثجيل الچان مضنيها

مشعل نور وجهك نورتهه بنور زحت ليل الطغات وكل دياجيها

محلت عگبك بلادي ولا رشگهه الغيث سحاب انته ومطرهه وكل مساجيها

تراده الحال بيههة وكثر ويد الموت رحيلك عم حزنهه بكل محاريها

رتفع هامك زعيم ورمز للاجيال زدت الوطن رفعه وصرحه بانيها

بس ثورتك ثورة وما عليهه غبار كل سلطه الوراك تراب واطيها

ذكره فخر وابدن ما تزول دهور عطرها بكل قصيد تهب قوافيها

يظل تموز رايه تعلي للامجاد يزهي اربع طعش حاظر وماظيها

حر ونهض بيهة وللشرف عنوان موش ابن الخطيئه وابن ناصيها

مو منصف اللامك تعداك اللوم معروف الگعيدة وطب حراميها

لا عثرة عثرتهه ولا درب زليت كبوات الفرس من جدم رجليها

يمأمم نفطها شلون تهنا براح أبو هدله التفرعن كل بلاويها

الحاك الدسايس بين هذا وذاك طبات السفاره بمصر نرويها

وحگك يا زعيم الناس كل الناس لوحة انتة لعراق وفرطو بيها

وسمت الشجاعه وطلعتك مقدام وجه مشرق الك صوره بمعانيها

انته الاسد ضاري وغيرك جبينات عز روحه الجبان بغار حاميها

سطرت البطولة ونومست بغداد من خضت المنايه بسوح واديها

حيطان الدفاع ومذابحها شهود موش انته العنتها وهينه مطيهه

يظل عهدك علينه بذمة التاريخ سيرة المجدتهه بشرف نحييها